17 кастрычніка 2018 года ў сценах гімназіі адбылася чарговая сустрэча з беларускімі пісьменнікамі, прысвечаная памяці вядомага беларускага літаратара Уладзіслава Нядзведскага, імя якога з 2005 года носіць Мікашэвіцкая гімназія.
Пачалося мерапрыемства выступленнем гімназістаў.Увазе прысутных быў прапанаваны літаратурны мантаж у выкананні вучняў 9 класа на верш “Я помню ўсё” У.Нядзведскага.
Вядучыя (вучні 10 класа Бурык Алеся і Здрок Анатоль) у вершаванай форме правялі экскурс па асноўных момантах жыцця і творчасці пісьменніка-земляка.
Прагучалі вершы Уладзіслава Іосіфавіча ў выкананні Войткуса Івана (7 клас) і Мацукевіч Аліны (8 клас).
Кожны год літаратурна-музычныя імпрэзы, падрыхтаваныя творчым калектывам вучняў гімназіі, не абыходзяцца без музычных кампазіцый на словы У.Нядзведскага. Сёння прагучаў чарговы дэбют у выкананні вучняў 11 класа Пуцель Анастасіі і Цярэні Уладзіміра, якія паклалі на музыку верш “Сасна”.
Пасля музычнай часткі адбылося ўзнагароджванне вучняў, што праявілі свае здольнасці ў прыгожым пісьменстве. Так прэмію імя У.І.Нядзведскага атрымала вучаніца 11 класа Дзедзіна Анастасія. Граматамі і салодкімі прызамі былі адзначаны Войткус Іван (7 клас), Кароткая Мілена і Штурма Аляксандра (8 клас).
Пасля дырэктар гімназіі Высоцкі С.П. запрасіў для выступлення на сцэну шаноўных гасцей-літаратараў. Сваімі творамі пра малую радзіму падзяліўся пісьменнік і перакладчык Васіль Жуковіч. Ліхтаровіч Георгій Леанардавіч, беларускі фотамастак, сябар Саюза беларускіх пісьменнікаў, прачытаў свае “ліхтарынкі”, падзяліўся творчымі здабыткамі. Сапраўдны міні-канцэрт падараваў прысутным Алесь Камоцкі, бард, песеннік, паэт, які проста зачараваў залу рамансамі ў асабістым выкананні.
Прагучала прывітальная прамова да ўсіх прысутных краязнаўцы і журналіста з газеты “Інфарм-прагулка” Вадзіма Жылко, а таксама лунінецкага пісьменніка Мікалая Ільючыка.
Вялікую ўдзячнасць гасцям за праяўленую ўвагу да мерапрыемства выказаў дырэктар гімназіі С.П. Высоцкі. Цёплая сустрэча ў сценах навучальнай установы кранула і ўсхвалявала ўсіх. Акрамя таго, у прысутных была магчымасць набыць зборнікі літаратурных твораў, што прывезлі з сабой госці са сталіцы, а таксама ўзяць на памяць аўтографы ў мастакоў слова.
Пачэсная справа ўшанавання памяці пісьменніка-земляка У. Нядзведскага будзе працягвацца і далей, бо без прошлага не будзе будучыні. Вучні і настаўнікі гімназіі вельмі ўдзячныя Людміле Васільеўне Несцяровіч (бібліятэчнаму дзеячу з Мінска), якая штогод дапамагае арганізоўваць літаратурныя сустрэчы, што так кранаюць душу, далучаюць да беларускай мовы і літаратуры не толькі дзяцей, але і дарослых.
Дзверы гімназіі заўсёды адчынены для творчасці, ініцыятывы, новых адкрыццяў.
