Добрай будзе тая хата, дзе гасцям заўсёды рады,так гаворыць народная мудрасць. Заўсёды рады гасцям і ў нашай гімназіі імя У.І.Нядзведскага. Дзверы яе адчынены для добрых, шчырых, таленавітых людзей. Здавалася б, чым можа сёння здзівіць, зацікавіць слова паэта, сустрэча з ім, калі вакол інтэрнэт-прастора… Ды не, жывую гутарку не заменіць ніякі Facebook. Гэта яшчэ раз пацвердзіла сустрэча з паэтам Міхасём Скоблам і салісткай Беларускай дзяржаўнай філармоніі Таццянай Грыневіч-Матафонавай,якая адбылася 18 красавіка ў сценах Мікашэвіцкай гімназіі імя У.І.Нядзведскага. Такія спатканні з творчымі людзьмі сталі ў нас добрай традыцыяй. Адкрыў сустрэчу дырэктар Сяргей Высоцкі. Ён шчыра вітаў гасцей і перадаў слова Канапацкай Таццяне Васільеўне, якая прадставіла творцаў з Мінску.
Міхась Скобла наш часты госць. Да гэтага ён двойчы наведваў гімназію. Скончыў філалагічны факультэт БДУ (1991), працаваў у Міністэрстве культуры і друку, у рэдакцыі часопіса «Роднае слова», намеснікам галоўнага рэдактара выдавецтва «Беларускі кнігазбор». Аўтар кніг паэзіі «Вечны Зніч» (1990), «Вочы Савы» (1994), «Нашэсце Поўні» (2000), кнігі літаратурных пародыяў «Розгі ў розніцу» (1993), зборніка вершаў для дзяцей «Камень-перунок» (1998), кнігі гістарычных нарысаў «Дзярэчынскі дыярыюш», “Акно для матылькоў” і інш. Cкладальнік анталогій беларускай паэзіі 20 ст. «Краса і сіла» (2003) і сусветнай паэзіі ў беларускіх перакладах «Галасы з-за небакрая» (2008).
І вось ён зноў завітаў у Мікашэвічы. Падчас сустрэчы гучалі самабытныя, напоўненыя розумам і пачуццямі вершы. Прыемна было атрымаць у падарунак кнігі непасрэдна ад самога аўтара. Ніхто не спяшаўся разыходзіцца. Дзеці задавалі пытанні гасцям. Бачна было, што вершы знайшлі водгук у сэрцах вучняў. На развітанне Міхась Скобла напісаў пажаданне:
“Вучням Мікашэвіцкай гімназіі - хай матылькі радасці і любові часцей залятаюць у Вашы вокны!"
А вось з Таццянай Грыневіч-Матафонавай мы сустрэліся ўпершыню. Свой выступ яна пачала з песень на словы беларускіх паэтаў: У.Дубоўкі “ О Беларусь, мая шыпшына”, М.Багдановіча “Зорка Венера” , “Па над белым пухам вішняў”. Уся зала слухала яе з захапленнем, голас Таццяны гучаў зычна і мілагучна. Пасля выступлення яна распавядала пра сябе і свайго сына, якому дапамагала ў вывучэнні праграмных вершаў беларускіх паэтаў, а потым вырашыла дапамагчы ўсім настаўнікам і вучням беларускіх школ і выдала некалькі альбомаў з песнямі і вершамі паэтаў Беларусі (“Няма прыгажэй ад маёй Беларусі”, “Сотня вершаў”, “ Пасьпеўкі”, “Альбомы школьных песень”, “Дзіцячы альбом”, “Кветка шыпшына”).
Гэтая сустрэча пакінула цёплыя ўспаміны ў нашых сэрцах. І ў кнізе памятных сустрэч Таццяна напісала пажаданне для ўсіх гімназістаў: “Няхай вашым дэвізам па жыцці будзе чатырохрадкоўе Ларысы Геніюш:
"Адзінай думкі не зракуся
І сэрца мне не задрыжыць.
Як жыць, дык жыць для Беларусі.
А без яе зусім не жыць.”
Бібліятэкар гімназіі Клеўжыц Марыя Андрэеўна.